ក្រុមបាល់ទាត់ជម្រើសជាតិកម្ពុជា បានប្រកួតចាញ់ក្រុម Kunming Yiya Yang Guang របស់ចិន ដោយលទ្ធផល ១ ទល់ ០ ក្នុងវគ្គ ១/៤ ផ្ដាច់ព្រ័ត្រនៃពានរង្វាន់ 2015 Yunnan-ASEAN International Football Open Tournament លើទីលានកីឡដ្ឋាន Mangshi Stadium ក្នុងទីក្រុង Mangshi ខេត្ត Yunnan។
សម្រាប់ជម្រើស ១១ នាក់ដំបូងរបស់លោកគ្រូ Lee Tae Hoon ថ្ងៃនេះមាន៖
អ្នកចាំទី៖ ប្រាក់ មុន្នីភារុណ
ខ្សែការពារ៖ ពុំ ដារាំង, នេន សុធារ័ត្ន, សាន់ ធីដេត និងសឿយ វិសាល
ខ្សែបម្រើ៖ រឿម ចាន់រឿន. ទូច រ៉ូម៉ា, ឈិន ឈឿន, ទិត្យ ឌីណា,
ខ្សែប្រយុទ្ធ៖ ច្រឹង ពលរដ្ឋ និង ផានី អ៊ីរដ្ឋា
ក្រុមកម្ពុជា អស់ឱកាសឡើងទៅជុំបន្ទាប់ហើយ បន្ទាប់ពីបរាជ័យនេះ។ យោងតាមលោក ឆាំង ពិសិដ្ឋ អ្នកចាត់ការទួទៅក្រុមជម្រើសជាតិ បានប្រាប់មកថា ក្រុមកម្ពុជា នឹងធ្វើដំណើរត្រឡប់មកវិញ នៅថ្ងៃព្រហស្បត្តិ៍ ស្អែកនេះ។
សរុបមកក្រុមកម្ពុជា ធ្លាប់បានឆ្លងកាត់ ប្រកួតក្នុងពូល E ដោយក្នុងនោះបានយកឈ្នះក្រុម Baotou Nanjiao FC របស់ចិនដោយលទ្ធផល ៣ ទល់ ១ ហើយបន្តឈ្នះក្រុម Lao Champa ដោយលទ្ធផល ២១ ទល់ ០ និងចុងក្រោយចាញ់ក្រុម Hà Nội T&T ក្នុងលីកកំពូលរបស់វៀតណាម ៣ទល់១ និងស្មើជាមួយក្រុម Yunnan។ ចុងក្រោយចាញ់ក្រុម Kunming Yiya Yang Guang ១ ទល់ ០ វគ្គ ១/៤ ផ្ដាច់ព្រ័ត្រ នេះ។
ពាន រង្វាន់អាស៊ាន-ចិននេះមានក្រុមចូលរួមចំនួន ៩ ដោយក្នុងនោះមានតែ ២ ពូលទេ គឺពូល E និងពូល F។ សម្រាប់កម្ពុជា ស្ថិតក្នុងពូល E ជាមួយក្រុម Baotou Nanjiao FC របស់ចិន, Lao Champa របស់ឡាវ, Hà Nội T&T របស់វៀតណាម និងក្រុម Yunnan របស់ម្ចាស់ផ្ទះ។ ចំណែកពូល F មានក្រុមជម្រើសជាតិ បង់ក្លាដេស, មីយ៉ាន់ម៉ា, ក្លិបHe Bei Jing Ying FC របស់ចិន និងក្លិប Lijiang FC របស់ចិន។
ពានរង្វាន់នេះរៀបចំឡើងក្នុងគោលបំណងភ្ជាប់មិត្តភាពតំបន់អាស៊ាន និងប្រទេសចិននេះ នឹងរៀបចំចាប់ពីថ្ងៃទី ២០ ដល់ ៣០ ខែ វិច្ឆិកា ឆ្នាំ ២០១៥ នៅទីក្រុង Mang Shi City ក្នុងខេត្តYunnan ដែលមានព្រំប្រទល់ជាប់នឹងប្រទេសតំបន់អាស៊ាន ដូចជា វៀតណាម ឡាវ និង មីយ៉ាន់ម៉ា ជាដើម ដោយរៀបចំចាប់ពីថ្ងៃទី ២០ ដល់ ៣០ ខែ វិច្ឆិកា ឆ្នាំ ២០១៥៕
